hugleiðingar efnishyggjukonu

Afmælisgjöf

Ég saumaði þessa kisu og litarúllu handa Örnu mágkonu eitt sinn. Bókin er kennslubók í að búa til alls konar dýr úr sokkum :)

Villutaska

Ég saumaði þessa eitt sinn í afmælisgjöf handa Villu vinkonu. Skemmtileg útfærsla, taskan opnast ótrúlega vel svo það er hægt að geyma t.d. allt hand-saums-dótið í henni; bróderískæri, málband, nálar, tvinna, fingurbjargir o.þ.h. Blómamyndin framan á er applikeruð með "needle-turn" aðferðinni og hún kemur fyrir fjórum sinnum á töskunni, allan hringinn.

Fríða Ágústsdóttir saumaði líka eina svona á Löngumýri síðasta haust. Hennar er allt öðruvísi en alls ekki síðri, alger konfektmoli, sjá hér :)

Plómukaka - Plumcake

Ég var svo heppin að fá að dveljast í Þýskalandi nokkur sumur þegar ég var komin í gagnfræða- og menntaskóla. Ég bjó hjá mínum dásamlegu vinum í Moseldalnum, Storck-fjölskyldunni. Þau eru vínræktendur eins og allir þeirra niðjar langt aftur í aldir. Í gegnum þau fékk ég svo líka vinnu á Waldschloss, hestabúgarði fyrir ofan Moseldalinn.

Bóndinn þar var kontidor að mennt og rak eitt sinn frægt konditor bakarí í Frankfurt. Þar hitti vel á fyrir sælkerann mig enda var það ekki sjaldan að Günther slakaði á í eldhúsinu eftir annasaman dag og galdraði fram hverja krásina á fætur annarri. Uppskriftir sáust aldrei heldur var allt bakað eftir minni og tilfinningu. Tvær bestu kökurnar sem ég fékk hjá Günther voru báðar ekta þýskar: ostakaka og plómukaka. Uppskrift að plómukökunni tókst mér ekki að fá en eitt sinn fylgdist ég með honum baka ostakökuna og stoppaði hann í hverju skrefi, tók hráefnin sem hann ætlaði að fara að fleygja ofan í skálina og náði að mæla og vigta áður en hann blandaði öllu saman. Hann hafði afskaplega gaman að þessari tilraun minni en skildi ekki þessa nákvæmisþörf í mér (ætli ég sé þá eins og nákvæmi kokkurinn í auglýsingunum? "það er ekkert dass í þessu"!! :))

Þjóðverjar nota svokallað kvark (e. speisequark) mikið, bæði í kökur, súpur og beint á brauð. Günther notaði hreint kvark í ostakökuna. Ég man að MS framleiddi eitt sinn kvark í smá tíma en það virðist ekki hafa gengið hjá þeim, ætli við Íslendingar höfum nokkuð vitað til hvers við ættum að nota það?!! Þegar ég kom heim prófaði ég skyr í staðinn og það virkaði vel, enginn munur.

Ég var þó ekki nógu sátt við að eiga ekki uppskrift að plómukökunni svo ég fór að leita í öllum bókunum mínum (áður en ég ætlaði á netið auðvitað) og viti menn, ég fann uppskrift að plómuköku í einni þeirra. Ég ákvað að prófa og kakan er ljúffeng. Gott er að nota vel þroskaðar plómur og ég held ég verði að minnka degið aðeins eða fá mér stærra form. Ég á ekki neitt gott bökuform (pæ-form) en það væri örugglega fallegra að baka hana í svoleiðis formi. Hér er s.s. afraksturinn og ég læt uppskriftina fylgja.

Plómukaka:

250 gr hveiti
1 tsk þurger
50 g sykur
125 ml ylvolg mjólk
salt á hnífsoddi
50 g smjör, bráðið
1 egg
800 g plómur
2-3 msk flórsykur

Hveitið velgt, t.d. í ofni og sett í skál. Laut gerð í miðjuna. Ger, sykur og volg mjólk hrært saman við og hellt í lautina. Hveitinu hrært saman við smátt og smátt og deigið hnoðað þar til það er slétt og sprungulaust. Látið lyfta sér á hlýjum stað í um hálftíma, eða þar til það hefur töfaldast. Á meðan eru plómurnar opnaðar til helminga og steinhreinsaðar. Ofninn hitaður í 180°c. Deigið er flatt út og lagt yfir smurt, stórt bökuform eða grunnt tertuform. Plómunum raðað í hringi á deigið; þær eiga að þekja það allt, nema barmana. Sett í ofninn og bakað í um hálftíma, eða þar til brúnirnar hafa tekið góðan lit og plómurnar eru meyrar. Flórsykur sigtaður yfir volga kökuna og hún borin fram. 

p.s. Myndir og uppskrift að ostakökunni koma síðar

Veisla í Óttuhæð

Við héldum veislu á laugardaginn. Mamma og Eiki gerðu Sushi fyrir 40 manns (það voru samt bara 10 fullorðnir og 5 börn í veislunni!) og í eftirrétt voru bollakökur. Þar sem ég á afmæli á hrekkjavökunni, 31. október, þá gerði ég hrekkjavöku-kökur. Ég beit hins vegar í mig að gera líka smjörkremskökur í væmnum litum og í doppóttum möffinsformum svo auðvitað gerði ég bara bæði :)

Sushi sushi sushi...

Hjartataska

 
Nú líður að því að ég fari ásamt fríðu föruneyti á Löngumýri í Skagafirði á vegum Quiltbúðarinnar. Þetta er helgi sem við hlökkum til í 361 dag á ári og loks er að koma að þessu. Það er venjan að maður komi með eina gjöf, heimagerða eða keypta. Gjafirnar eru settar í pott og svo er dregið - þannig fá allar eina gjöf. Að þessu sinni saumaði ég hjartatösku, en uppskriftin er mín og birtist í nýjasta Fréttablaði Íslenska bútasaumsfélagsins. Þannig að ef ykkur langar í þessa uppskrift, skráið ykkur í félagið og þið fáið sent nýjasta blaðið með þessari uppskrift í :)

 
Vonandi fer taskan á góðan stað til glaðrar konu! Ég saumaði reyndar tvær svona því Sigrún frænka ætlar líka á Löngumýri og ég bauðst til að græja gjöf fyrir hana.

Mig klæjar í fingurna

Mig langar bara að fara að sauma, prjóna og hekla þegar ég sé þetta myndband, svoooo girnilegt :)

 

My fingers are itching... I just want to go sewing, knitting and crochetting when I see this video, it's so delicious! :)

Ballerína

 

Ég held í alvörunni að það sé gjörsamlega EKKERT sætara í öllum heiminum en hrúga af þriggja ára bleikum sykurpúða-ballerínum að stíga sín fyrstu skref í ballet! Arna litla hóf ferilinn í morgun og ég veit hreinlega ekki hver var spenntust; Arna, Andrea eða ég :)

 

Hún stóð sig svo vel og þurfti sko ekki að láta halda í hendina sína, gerði allt af mikilli nákvæmni sem kennarinn sagði og skemmti sér (og okkur hinum) alveg konunglega.

 

I really think that there's absolutely NOTHING cuter in the whole wide world than bunch of three years old, pink marshmellow ballerinas taking their first class ever! Arna took her first class this morning and it was hard to tell who was more excited, Arna, Andrea or me :)

 

She did a great job and had such a fun time.

 
Andrea, Arna og Anna Vigdís

Hekluð blóm - Crochet flowers

 

Ég var á fundi í vinnunni í síðustu viku og þar var ein samstarfskona mín með alveg svakalega fallegt poncho. Það var myndað úr fullt af hekluðum blómum, bæði stórum og litlum, einföldum, tvöföldum og jafnvel þreföldum. Blómin voru hekluð úr afgangsull, sum úr Álafosslopa og önnur úr tvöföldum plötulopa. Stundum voru tveir eins litir þræðir notaðir og stundum sitthvor liturinn. Alger snilldarhugmynd til að nýta afgangana. Svo ég settist niður og prófaði. Ég fann uppskrift að blómum á Garnstudio. Þessi uppskrift er að þreföldu blómi, sem er mjög sniðugt, því þá getur maður valið hvort maður vill prjóna eitt, tvö eða þrjú lög í hverju blómi. Ég notaði heklunál nr. 7 og hef enn bara prófað plötulopann. Nóg er til af afgöngum en venjulega fer ég með þá ýmist í skólann hjá krökkunum eða leikskólann hennar Örnu. Nú ætla ég að sjá hvort ég endist til að klára svona poncho (jú jú, er það ekki??) og fara svo með afgangana út í skóla/leikskóla :)

 
A co-worker of mine came to work the other day wearing the most beautiful poncho. The poncho was made with all kinds of knitted flowers. These were small and big flowers, some in layers (up to three layers) but all made with Lopi scraps. What a great idea to use all the lopi leftovers. So I rushed home to try. I found the pattern for the flower at Garnstudio. It's a clever pattern because you can choose if you want to make it in single, double or triple layer. I used a fairly big needle; 7.0 mm. I'm going to try to make enough flowers for at least one poncho - and then I'll give the rest of the lopi to the school and kindergarten, like I'm used to.

Bara matur - just food!

Ég elska fallegan, litríkan mat :) Rótargrænmetissalsa, berjaþeytingur og mangosalat... mmmhh!

I love beautiful, fresh, colorful food :) - Rootvegetablesalsa, berrysmoothie and mangosalat... mmmhh!

 

Sushigerð með vinum - Sushimaking with friends!

 
 

Snið í Fréttablað Íslenska bútasaumsfélagsins

 

 

Þá fer nýjasta Fréttablað Íslenska bútasaumsfélagsins að koma út. Í blaðinu verða m.a. leiðbeiningar að þessum sætu hjartapokum. Tilvaldir að taka með í búðina og til gjafa, t.d. handa litlum prinsessum, góðum ömmum eða bestu vinkonum!

 

Einnig verða betur útlistaðar leiðbeiningar fyrir þríhyrninga-ferningana. Svo upp með allar hlauprúllurnar (jelly roll) og ræmu-afgangana :)

Ef þið eruð ekki í félaginu nú þegar, getið þið skráð ykkur hér!

kv.
Berglind